Kervíkurfjall í Vestmannaeyjum

3. maí 1967 urðu Eyjamenn varir við flugvélargný yfir Heimaey. Flugvél hringsólaði yfir eyjunum og virtist leita færis að lenda á flugvellinum. Dimmir éljabakkar gengu yfir eyjuna, og þegar rofaði til sást skyndilega ekkert til vélarinnar né heyrðist lengur frá henni. Fljótlega var ljóst, að hún hafði rekist utan í sæbratta hlíð Kervíkurfjalls suður á eyju. Margir lögðu leið sína á slysstað, þar sem sjá mátti brak úr vélinni í fjallinu og útlínur hennar á hafsbotni undir sæbörðu berginu. 3 ungir menn fórust með flugvélinni, en hún var full af ýmis konar varningi, og ægði honum saman í sundurtættri hlíð Kervíkurfjalls. Það tók einungis fá ár fyrir bjargfuglinn að afmá ummerkin eftir slysið, og lundinn endurheimti brekkuna fyrir hreiður- og holugerð. Ekki er hægt að mæla með göngu um snarbratta hlíðina, en mörgum áratugum eftir slysið gátu þyrstir eyjapeyjar eftir fótboltaæfingu á Ræningjaflöt í Lyngfellisdal svalað þorsta sínum með gosdrykkjum úr glerflöskum, sem geymst höfðu djúpt í grassverðinum eftir hið voveiflega flugslys.